Monday, December 27, 2010

آمان نولئیدی بیر اوشاخلیغی تاپایدیم

کئچن یئتدیلیکده بیر عزیز یانیمیزدان گئتدی. هله ده گئتمه‌یینین اینانماسی چتیندیر. بیر بویوک آتادان یوخسا بیر آتادان دا آرتیق بیر عزیز. یئتیشدیگیم زامان دیه‌سن تزه‌جه، ملکلر مؤمینین بو دنیا کؤرپوسوندن کئچنده گتیردیکلری گولو اییله‌میشدی. هر گنجه، دان یئری سؤکولمه‌دن سجاده سین سرن یئرده قیبله‌یه ساری یاتمیشدی. بیلمیرم او آندا نه گؤرموشدو اوچ یول اللرین گؤیه قالدیرمیشدی.
بو نئچه واختدا هردن ائله بیلیرم یوخودایام و ایندیسه آیینیب گؤره‌جه‌یم بیر بئله سورعتله کئچن اولایلار یوخویموش. نئیله‌مک هامیمیز یوخوداییق و بو خارابالیقدان کؤچن گون گؤز آچاجاغیق. نئجه کی بویورموشلار: «الناس نیام فاذا ماتوا انتبهوا»
بوگونلریمین تسکینلیگی، اوستاد شهریارین «خان ننه هایاندا قالدین»ینین سون بندلری دی بیرده قرآنی ختم ائتمک.
...اؤزون دئییردین
کی بهشت‌ده الله
وئره‌جک نه ایستیورسن
بو سؤزون یادیندا قالسین
منه قولینی وئریبسن
ائله بیر گونوم اولورسا
بیلیرسن نه ایسته‌رم من؟
سؤزیمه دوروست قولاق وئر
سن ایلن اوشاخلیق عهدین
...آمان نولئیدی
بیر اوشاخلیغی تاپایدیم
بیرده من سنه چاتایدیم
سنیلن قوجاقلاشایدیم
سنیلن بیر آغلاشایدیم
یئنیدن اوشاق اولورکن
قوجاغیندا بیر یاتایدیم
ائله بیر بهشت اولورسا
داها من اؤز الله هیمدان
باشقا بیر شئی ایسته‌مزدیم

Friday, December 10, 2010

یئل

بو گونلر هاوانین توستو دومانی اوستاد شهریارین بو بیتین یادا سالیر

هاوا اینسانی بوغور باش باشا گاز کربنیک اولموش
یئل ده اسمیر، ائله بیل یئل ده سلیمان ایله گئتدی

Wednesday, December 8, 2010

حسینه یئرلر آغلار گویلر آغلار

حسینه یئرلر آغلار گویلر آغلار

رسول مصطفی پیغمبر آغلار


حسینین نوحه سین دلریش یازاندا


مسلمان سهل دیر کی کافر آغلار


کور اولموش گؤزلرین قان دوتدو شیمرین


کی گؤرسون اؤز الینده خنجر آغلار


حسینین کؤینه گی زهرا الینده


چکر قیحا قیامت ، محشر آغلار



آتاندا حرمله ، اوخ کربلاده


گؤریدین دوشمن آغلار ، لشکر آغلار

قوجاغیندا ، گؤردین ام لیلا


آلیب نعش علیّ اکبر آغلار


رباب ، نیسگیل دؤشونده سود گؤرنده


علیّ اصغری یاد ائیلر آغلار


باشیندا کاکل اکبر هواسی


یئل آغلار ، سنبل آغلار ، عنبر آغلار


یازاندا آل طاها نوحه سین من

قلم گؤردوم سیزیلدار ، دفتر آغلار

Monday, November 15, 2010

قارماقاریشیق بئیین-قارماقاریشیق کیملیک

دوکتور «عبدیلکریم سوروش» جنابلاریندان، اینسانی بیلیملره ایلگی‌لی بیر یازی اوخودوم. بورادا هئچ ایسته‌میرم بو یازیا نقد یازام. بیلمیرم بو جنابین همدانلی عینوالقوضات دا باش آچمایان قورولوشدا یازیلان سؤزلرین کیملر اوخویورلار. آنجاق آد آپاردیغیمیز یازی بوتونلوکده بیر کیملیکچی‌لیک آدی داشیان بولاغدا بیر داها یاییلمیشدیر(+). تکجه قالمیشام بئله‌نچی بیر سیناغین باشدان گئچیرتمیش آدامین سؤزلرینین یئری بیزیم تورکجه بولاغلاردا نه اولا بیلیر؟ دئدیگیم کیمی، هئچ ایسته‌میرم بورادا او سؤزلرین نقدینه باشلاییب؛ مثلده گؤره‌ک عبدیلکریم جنابلاری بویوردوغو کیمی، دین عالیملری ایسته‌ییرمیشلر گمی دوزه‌لتمک یولون دا قورآندا گلن نوح جنابلاری‌نین آیه‌لریندن اؤیره‌نسینلر و اینقلاب فرهنگی سیتادیندا، بو سوروش جنابلاری ایمشلر کی ائله‌نچی بیر بیلگی اودلایان بوش سوزلرین آلاوین سؤندورموشدو یوخسا یوخ!
سؤزوم تکجه بو دور:
سوروش جنابلاری «اخلاق خدایان» کیتابینین «قارماقاریشیق ذئیین-قارماقاریشیق کیملیک» یازیسیندا (ذهنیت مشوش، هویت مشوش) بئله بیر سؤزو وار:
«یئتیشک بو سوروما: بیز ایرانلی‌لار کیمیک... ایندیسه بیزیم کولتور ... اوچ کولتوردن قاتیلیبدیر: 1.ایرانی 2. ایسلامی 3. باتی کولتورو. ایرانی کولتوردن ایندی ان اؤنملی‌سی پارسجا دیلی دیر کی بیز ایله قالیب.»
{«می رسیم به  این سؤال تفصیلی که ما ایرانیان کیستیم...فرهنگ کنونی ما، چنان که در جای دیگر به تفصیل آورده‌ام، مرکب از سه فرهنگ است:1.ایرانی 2. اسلامی 3.غربی. الف. از فرهنگ ایرانی؛ اینک مهمترین عنصرش که زبان پارسی است، با ماست.»}
بو دوکتور جنابلارینین یازیسین یایان سایین تورک قارداش! گؤرورسن کی بو آدامین قارماقاریشیق بئینینده من ایله سنین تورک دیلی ایرانلی‌لیق ایله بیر یئره سیغینان بیر زاد دئییل. سیزین دوشونجه‌ز، یئرینده مؤحترمدیر آنجاق بو آدامدان آیری یئرلرده یانداشلیق ائتسه‌ز ده سؤز یوخ؛ آمما بیزیم دیلیمیزین دیرچه‌لیشینده بئله بیر یازیلاری بولاغلاریمیزدا یایماغین نه یاردیمی اولا بیلیر؟

Saturday, October 30, 2010

دیریلتمک یوخسا پوزماق؟

اؤیره‌نجی‌لیک‌ین ایکی‌نجی ایل‌ینده، عائله‌میز بیر نئچه گون گلمیش‌دیلر ایصفاهانا. بیلی‌یوردون قوناق‌ائوینده اونلارا اوتاق توتموشدوم. ایندی‌ ده آنامین قیچ‌آغریدان اسن آددیملارین گؤرنده او گونلر گلیر گؤزوم اؤنونه. آللاوئردی‌خان کؤرپوسوندن خاجو کؤرپوسونه دک، سونرا دا خاجو چارباغیندان، نقش جاهان مئیدانینا دک گزه گزه یئرده گئتمه‌گیمیز گونلر.
اوندان بوندان سوروشا سوروشا دؤندوک اوزون اه‌یری بوروق باشدا نقش جاهان‌دان باش چاغاردان بیر اوستو باسدیریلی بازارا. بیردن آنام دؤنوب دئدی: «مهدی، بولاری نئینیریخ؟ بولار کی ائله مراغانین قود مئیدانی‌نین ده‌هنه‌لری‌دی!» گؤز دولاندیردیم. دوز دئییردی. توکاندا ایگده-بادام قالاقلاری دالیندا اوتوران قوجانی دا قود مئیدانی‌نین قوجالارین‌دان سئچمک اولموردو.
تورکلرین ایصفاهان ایله اشکانلی‌لار، سلجوقلار و صفوی‌لر زامانلارین‌دان تانیشلیغی اولورسادا من بو اوخشارلیقلاردا خاجه نصیرین مراغادا و شیخ باهایی‌نین ایصفاهاندا (بو ایکی شهرین باشکندلیقلاریندا) چالیشیقلارین اؤنملی بیلیرم.
[اورتا یازی: بو مئیدانین تابلوسوندا شهرداری، «میدان قطب» آدین یازدیرمیشدی. هله بو آد هارادان تاپیلیبدی الله بیلسین. آنجاق آذربایجاندا یئرلر، شهرلر، چایلار و ... آدلاری‌نین نیسگیللی ناغیلین یازسان یئتمیش باتمان کاغاذ آپارار. قالسین سورایا.]
بیر نئچه واقت بوندان قاباق خبرلرده ایصفاهاندا عتیق میدانی‌نین دیریلتمک (احیا) طرحی‌نین ایلک فازی یولا توشمه‌سی خبری گلمیشدی؛ مراغانین قود مئیدانی‌نین یاریمچیلیق بوراخیلمیش پوزولما (امحا) طرحی یادیما توشدو. بو میللی(!) طرحدن بیر نئچه چکیم گؤرون:






گرچک

سلام

الله دیه‌ن اولسا یاخین گله‌جکده تورکجه یازیلارلا سایقیلی دوستلارین قوللوغوندایام.